Futbol tarixinə aid ən nadir eksponatlardan biri olan və "Ginnesin Rekordlar Kitabı" tərəfindən dünyanın ən qədim futbol topu kimi tanınan tarixi əşya ilk dəfə Şotlandiyadan kənara çıxarılaraq ABŞ-yə gətirilib.
Offsideplus.az xəbər verir ki, 16-cı əsrə aid olan bu unikal eksponat Florida ştatında ictimaiyyətə təqdim olunur.
Tarixi topun ABŞ-yə səfəri 2026-cı il Dünya Çempionatı çərçivəsində baş tutan Şotlandiya – Braziliya qarşılaşması ilə eyni vaxta təsadüf edir. Florida ştatının Mayami şəhərindəki "Koral Geybls" muzeyində sərgilənən top, eyni zamanda iki ölkə arasındakı qrup oyunu zamanı da diqqət mərkəzində olacaq və azarkeşlərə futbol tarixinin köklərinə toxunmaq üçün nadir fürsət yaradacaq.
Top Şotlandiyanın "Stirlinq Smit" sənət qalereyası və muzeyində qorunur və ölkənin ən dəyərli 25 tarixi idman eksponatından biri hesab olunur.
Layihə Şotlandiya muzeyi, Braziliyanın Şotlandiyadakı fəxri konsulluğu və Braziliyanın Mayamidəki Baş Konsulluğunun birgə tərəfdaşlığı ilə reallaşıb.
Tarixi eksponat iyunun 27-nə qədər Floridada "Diplomatiya və gözəl oyun: Şotlandiyadan Braziliyaya və Haitiyə" adlı xüsusi sərgi çərçivəsində nümayiş etdiriləcək.
