İspaniyalı mütəxəssis keçmiş klubları olan "Çelsi" və "Arsenal"da baş məşqçi postuna keçəcəyi ilə bağlı iddialara son qoyub.
Offsideplus.az xəbər verir ki, hazırda İtaliyanın "Komo" klubunu çalışdıran Ses Fabreqas Premyer Liqaya qayıtmaqda tələsmədiyini bildirib. Son zamanlar London klublarında yaranan məşqçi boşluğu və Fabreqasın İtaliya Seriya A-da nümayiş etdirdiyi uğurlu nəticələr onun adının yenidən İngiltərə ilə hallanmasına səbəb olmuşdu.
Lakin gənc mütəxəssis mətbuata verdiyi açıqlamada hazırkı layihəsinə sadiq olduğunu vurğulayıb:
"Premyer Liqa dünyanın ən yaxşı liqasıdır və mən bir gün ora qayıdacağımı bilirəm. Lakin hazırda "Komo"da yaşadıqlarımız möhtəşəmdir. Mən anın dadını çıxarmağı xoşlayıram və diqqətimi tamamilə bu klubun uğurlarına yönəltmişəm."
Xatırladaq ki, Fabreqasın rəhbərliyi altında "Komo" cari mövsümdə Avropa kuboklarına vəsiqə qazanmaq uğrunda mübarizə aparır. İspaniyalı məşqçinin klubla müqaviləsi 2028-ci ilə qədər davam edir.
Mütəxəssis, gələcəkdə "Arsenal" və ya "Çelsi" kimi böyük klubları idarə etmək ambisiyası olsa da, bunun üçün hələ qarşıda uzun illərin olduğunu və tələsməyə ehtiyac duymadığını qeyd edib.
