Londonun "Çelsi" klubu baş məşqçi postuna yeni namizədini müəyyənləşdirib.
Offsideplus.az xəbər verir ki, hazırda Portuqaliyanın "Portu" klubunu çalışdıran italiyalı mütəxəssis Françesko Farioli "zadəganlar"ın rəhbərliyi tərəfindən ciddi şəkildə nəzərdən keçirilir.
Liam Rozeniorun gedişindən sonra boş qalan post üçün bir neçə variantı müzakirə edən klub rəhbərliyi, Fariolinin namizədliyi üzərində xüsusi dayanıb.
37 yaşlı Françesko Farioli müasir futbolun ən mütərəqqi gənc məşqçilərindən biri hesab olunur. Onun "Portu"dakı fəaliyyəti Avropa nəhənglərinin diqqətindən yayınmayıb.
İtaliyalı mütəxəssis Portuqaliya klubunda 74%-lik qələbə göstəricisi ilə diqqət çəkir.
O, hücumameyilli və yüksək pressinqə əsaslanan oyun tərzi ilə tanınır.
"Çelsi" rəhbərliyi artıq daxili iclaslarda Fariolinin komandaya gətirilməsi variantını geniş şəkildə müzakirə edib.
"Çelsi" rəhbərliyinin siyahısında yalnız Farioli deyil, bir neçə digər mütəxəssis də yer alır. Lakin italiyalının son vaxtlar göstərdiyi nəticələr onu siyahının ön sıralarına çıxarıb.
Xatırladaq ki, Françesko Fariolinin "Portu" ilə müqaviləsi 2028-ci ilin yayına qədər davam edir və onun sözləşməsində 20 milyon avroluq sərbəstqalma məbləği olduğu bildirilir.
