Uoker Kessler "Los Anceles Leykers"in heyətində ilk oyununa çıxıb və 16 dəqiqə ərzində 11 xal, 9 ribaund, 1 blokşut və 1 top oğurlama ilə yadda qalıb. Mərkəz oyunçusu yeni komandasında debüt etdikdən sonra təəssüratlarını bölüşüb.

Offsideplus.az xəbər verir ki, Kessler meydançada olmaqdan böyük zövq aldığını bildirib: "Çox uzun müddət idi ki, bu hissləri yaşamırdım. Oyun öncəsi həyəcanlı idim, amma parketdə hər şey əla keçdi. Mənim meydançada olmağım oyunun gedişinə təsir edir. Komanda yoldaşlarım perimetrdə əla müdafiə etdilər, topu yaxşı paylaşdıq. İlk hissə çox yaxşı alındı. Zamanla ritmim və oyun hissim bərpa olunacaq. İlk leyy-apda az qala meydançadan kənara çıxırdım, ayaqlarım istədiyim kimi işləmirdi. Ən çox darıxdığım isə, açıq desəm, qələbə uğrunda mübarizə idi. Hər oyunda qalib gəlmək istəyirəm. Ümumi fiziki hazırlıq baxımından özümü yaxşı hiss edirdim. İlk epizodlar çətin keçdi, amma sonra ritmimi tapdım, ayaqlarım işləməyə başladı. Hər şey əla idi. Cey Cey ilə mövsüm planımızı müzakirə etdik, əsas söz – israrlılıqdır. Hər ribaund, hər mövqe uğrunda mübarizə aparmaq, boyalı zonada geri çəkilməmək, müdafiədə və hücumda arxayınlaşmamaq. Bu, mövsüm üçün əsas məqsədimdir".