FIFA 2026-cı ildə ABŞ, Kanada və Meksikada keçiriləcək Dünya Çempionatında iştirak edəcək komandalar üçün nəzərdə tutulan mükafat fondunda əhəmiyyətli artım edib.

Offsideplus.az xəbər verir ki, Vankuverdə keçirilən FIFA Şurasının iclasında qəbul edilən qərara əsasən, daha əvvəl 727 milyon dollar olaraq açıqlanan ümumi məbləğ 871 milyon dollara çatdırılıb.

Bu 15%-lik artım iştirakçı ölkələrin artan təşkilati və logistik xərclərini kompensasiya etmək məqsədi daşıyır. Yeni bölgüyə görə:

• İştirak Bonusu: Turnirə vəsiqə qazanan hər bir ölkə (48 komanda) minimum 10 milyon dollar (əvvəl 9 milyon idi) qazanacaq.

• Hazırlıq Vəsaiti: Komandaların hazırlıq mərhələsi üçün ayrılan məbləğ 1,5 milyondan 2,5 milyon dollara qaldırılıb.

• Çempionun Mükafatı: 19 iyulda Nyu-Yorkda kuboku başı üzərinə qaldıracaq komanda 50 milyon dollar gəlir əldə edəcək.

• Əlavə Dəstək: Nümayəndə heyətlərinin xərcləri və bilet subsidiyaları üçün əlavə 16 milyon dollardan çox vəsait ayrılıb.

Bu rəqəmlər 2022-ci ildə Qatarda keçirilən Dünya Çempionatındakı mükafat fondundan (440 milyon dollar) təxminən iki dəfə çoxdur.

FIFA prezidenti Canni İnfantino təşkilatın tarixinin ən güclü maliyyə dövrünü yaşadığını və bu səbəbdən üzv assosiasiyalara rekord səviyyədə dəstək verildiyini bildirib.