Türkiyə Superliqasının həyəcan dolu həftəsində “Kocaelispor” lider “Qalatasaray” üzərində tarixi qələbə qazandı. 

Offsideplus.az xəbər verir ki, əvvəlcədən favorit göstərilən “Qalatasaray”ı evində 1:0 hesabı ilə məğlub edən “Kocaelispor” azarkeşlərinə unudulmaz bir gecə yaşatdı.

Görüşün yeganə qolunu ilk yarının son dəqiqələrində Daniel Agyei vurdu. 

Matç boyu topa daha çox sahib olan “Qalatasaray” rəqibin müdafiə dirəncini aşmaqda çətinlik çəkdi. Xüsusən ikinci hissədə təzyiqi artıran sarı-qırmızılılar Viktor Osimhenin vurduğu qolun VAR tərəfindən ofsayt səbəbilə ləğv edilməsindən sonra böyük məyusluq yaşadı.

Qarşılaşmadan əsas məqamlar:
"Kocaelispor" 1:0 "Qalatasaray"
Qol: Daniel Agyei (45’)
Assist: Serdar Dursun
Topa sahibolma: 35% – 65%
Dəqiq zərbələr: 3 – 3

Hakim Çağdaş Altayın idarə etdiyi oyunda ev sahibləri müdafiədə kollektiv və fədakar çıxış edərək üstünlüyünü sona qədər qorumağı bacardı.

Bu nəticə ilə “Kocaelispor” xallarını 14-ə yüksəldərək alt sıralardan uzaqlaşmaq baxımından vacib qələbə qazandı. “Qalatasaray” isə bu mövsümdəki ilk məğlubiyyətinə baxmayaraq, 29 xalla liderliyini qorudu.